Постојат мали дигитални алатки што не звучат спектакуларно, но штом еднаш ќе ги направиш, сфаќаш дека ти недостигале цело време. Таква е и оваа: едноставен генератор за „Lorem Ipsum“ текст на македонски јазик, направен како мини самостојна HTML апликација што може да се отвори директно во прелистувач.
Можете да ја пробате тука. Фајлот е намерно споделен како html фајл, кој можете да го симнете, едитирате, подобрите и споделите и вие.
Секој што работи со дизајн, веб-страници, брошури, книги, плакати или презентации знае колку често треба привремен текст. Вообичаено, тогаш се користи класичниот латински „Lorem ipsum“, но тој не кажува многу за тоа како навистина ќе изгледа македонски текст во распоредот. Кирилицата има поинаква тежина, поинаков ритам, поинакви должини на зборови, а буквите како ќ, ѓ, ж, љ, њ, џ, ч и ш сосема поинаку се однесуваат во ред, пасус и блок.
Токму затоа ја направивме оваа мала алатка: за да имаме пробен текст што барем малку повеќе личи на реална употреба на македонски јазик. Апликацијата овозможува генерирање пасуси со различна должина, избор на неутрален, уреднички или поприроден стил, како и можност за поголема застапеност на специфични кирилични букви. Со други зборови, не е само „празен текст“, туку практична помош за секој што сака попрецизно да тестира како изгледа еден дизајн пред да се внесе финалната содржина.
Особено е корисна за графички дизајнери, веб-дизајнери, студенти по мултимедија, издавачи, уредници и сите што прават макети, демо-страници, шаблони и концепти. Наместо секојпат да импровизираме со случајни реченици или со латински текст што нема врска со кирилицата, сега имаме домашна, едноставна и брза варијанта што може веднаш да се користи.
Апликацијата е направена како самостоен HTML фајл, без комплицирани инсталации и без зависности. Се отвора локално, работи веднаш, овозможува копирање на текстот, а може и да го сними како .txt фајл. Токму тоа беше и идејата: алатка што не бара многу објаснување, туку едноставно ти завршува работа.
Ова не е „голем проект“, туку мал, практичен придонес во духот на сето она што нè интересира на Арно – јазик, дигитални алатки, креативност и локална употребливост. Понекогаш токму ваквите ситни решенија се најкорисни, затоа што стојат некаде помеѓу дизајнот, технологијата и секојдневната работа. А кога еднаш ќе почнеш да тестираш распоред со вистинска кирилица, тешко се враќаш назад на класичното „Lorem ipsum dolor sit amet“.