Едицијата „Мала фактопедија“ се збогати со уште еден наслов: „Бунтовнички со причина! – жени од историјата на Македонија кои се бореле за прав(д)ата“.
Од воведот во книгичката пренесуваме:
„Извонредните жени отсекогаш ја обликувале историјата, ги поместувале границите и го подобрувале светот. „Бунтовнички со причина“ е смислена како почит кон нивната непоколеблива решителност и исклучителни достигнувања. Се надеваме дека оваа книга ќе служи и како инспирација за младите девојки и жени, охрабрувајќи ги да го искористат сопствениот потенцијал и да станат храбри креаторки на сопствената судбина и на историските промени.“
Во книгичката се вклучени Сирма Војвода, Катерина Арнаудова, Мирка Гинова, Вера Јоциќ, Естреја Хаим Овадија-Мара, Вера Циривири-Трена, Невена Георгиева – Дуња, Ибе Паликуќа, Фана Кочовска-Цветковиќ, Вера Ацева, Елпида Караманди, Мара Нацева, Раjна Алексова, Роса Плавева, Накие Баjрам, Мајка Тереза, Калипсо Налча, Веселинка Малинска, Хумашах Вардар, Оливера Jашар-Настева, Вања Лазарова-Димитрова, Бранка Станковска, Атина Бојаџи, Есма Реџепова и Оливера Наковска-Бикова.
Ова се нашите досегашни изданија од едицијата „Мала фактопедија“:
- Необични факти од животот на Алберт Ајнштајн (2017, Бранко Прља)
- Необични факти од животот на Никола Тесла (2017, Бранко Прља)
- Јаболкото на Њутн (2018, Бранко Прља)
- Неверојатниот живот на Стивен Хокинг (2019, Бранко Прља)
- Made In China – Кинески изуми (2019, Бранко Прља)
- 25 факти за аерозагадувањето и начини да го намалиш (2020, Бранко Прља и Владимир Прља)
- Мустаќлии кои го смениле светот (2021, Исак Сима)
- Вселенскиот пионер Јуриј Гагарин (2021, Бранко Прља)
- „Од кој филм беше?“ – 150 сцени од познати филмови (2021, Берт Стајн)
- 99.9 тотално забавни и сосема бескорисни факти… (2021, Исак Сима)
- Забавни факти за диносаурусите и други ужасно големи гуштери (2021, Нина Прља)
- „Пекол“но добро дело на Данте! (2021, Нина Прља)
- „Дај, не фрлај’“ – од Фејсбук група до еко-револуција! (2021, Бранко Прља и Владимир Карер)
- „Шапката му ет арна, ама глаата му ет празна“ – 50 цитати и поговорки за образованието! (2022, Бранко Прља)
- „Еднаш Курт Кобејн тропал со лажици по куфери…“ (2022, Бранко Прља)