Збороколаж: македонска игра со зборови

Драги љубители на македонскиот јазик и на креативното пишување, со големо задоволство ви ја претставуваме нашата најнова јазична игра – „Збороколаж“.

Што е Збороколаж?

Тоа е интерактивна јазична игра која ви овозможува да создавате уникатни фрази и реченици на македонски јазик. Со едноставно кликање или влечење на зборовите, можете да создадете ваши оригинални „збороколажи“ и да ја истражите креативната моќ на нашиот јазик.

Зошто овие експерименти?

Оваа игра е дел од нашите тековни експерименти со вештачка интелигенција, со цел да покажеме како современата технологија може да го збогати нашиот културен и јазичен израз. Сето тоа е дел од нашите напори за дигиталниот идентитет на Македонија (во светот на ВИ) кои активно ги правиме веќе две години. Збороколаж е уште еден чекор во нашите обиди за креативна употреба на ВИ во културната сфера. Оваа игра е направена со помош на јазичниот модел Claude 3.5.

Овие креативни експерименти со АИ не се платени од никој, немаме профит од нив и ги правиме единствено со желба за збогатување на нашата култура и будење интерес за истата кај помладите.

Искрено веруваме дека културата и уметноста имаат моќ да трансформираат едно општество – а сите знаеме дека истите ни се потребни како дожд во овие сушни времиња!

Што го прави Збороколаж посебен?

• Едноставност: Интерфејс кој е лесен за користење и ви овозможува брзо и лесно да создавате. Целата игра „тежи“ 12KB!
• Креативност: Ограничениот број на зборови ја стимулира креативноста, зашто ограничувањата раѓаат слобода!
• Флексибилност: Можете да создавате сè, од кратки фрази до цели реченици или дури и стихови.
• Образовна вредност: Одличен начин за истражување на богатството на македонскиот јазик.

Што понатаму?

Иако оваа прва верзија има ограничен број на зборови, тоа е всушност дел од предизвикот! Колку интересни комбинации можете да создадете со дадените зборови? Во иднина, планираме да додадеме тематски збороколажи и да го прошириме фондот на зборови и граматички форми.

Збороколаж е повеќе од игра – тоа е алатка за креативно изразување, за учење и за забава. Без разлика дали сте писател кој бара инспирација, наставник кој сака да ги заинтересира учениците за јазикот, или едноставно некој кој сака да си игра со зборови, Збороколаж е за вас!

Што направивме досега на ова поле?

• Пишувавме панграми на македонски јазик со помош на јазични модели (ChatGPT, Claude 3.5, Мета АИ)
• Трениравме АИ модели за создавање слики во различни стилови од нашите културни дејци (Горан Стефановски, Петре М. Андреевски, Тоше Проески, Ѓорѓи Абаџиев, Ацо Шопов и други)
• Анимиравме слики (Личеноски)
• Направивме верзија на Fortune cookies на македонски јазик и со традиционални македонски поговорки (Генератор на поговорки)
• Втора верзија во која корисниците може да додаваат нивни зборови и да создаваат креативни и нови поговорки (Генератор на поговорки v 2.0)
• Кратко видео за демонстрација на потенцијалот за промовирање на македонските говори (Малешевско –пирински дијалект)
• Направивме краток филм со помош на Runway Gen-2
• Направивме графичка новела („3 минути и 53 секунди“)
• Едукативни видеа (Исак Њутн, Никола Тесла)
• Визуелни приказни (Фармацевтот, Скопје, град на депонии, Скопје, град без мостови)

И некои други работи, но да не бидеме здодевни, напротив, целта е да инспирираме. Затоа, не чекајте! Посетете го „Збороколаж“, започнете да создавате ваши креативни дела и споделете ги вашите креации со нас. Кој знае, можеби ќе создадете нова македонска поговорка или ќе напишете почеток на следниот голем македонски роман!