Точка

Разговор: Менаџирање на културната сцена во кризни времиња (предизвици, шанси, партнерства)
 

Воведничари во разговорот ќе бидат проф. д-р Милена Драгичевиќ-Шешиќ, европски реномирана експертка за културна политика и културен менаџмент, професорка на Универзитетот за Уметности во Белград, и Теодор Целакоски, проект директор во Мултимедијалниот институт, МАМА, во Загреб. Разговорот ќе го води Никола Гелевски, од културниот центар Точка.

Разговорот има две основни цели:

1. како да се вкрстат регионалните теориски и практични искуства во менаџирањето на независната културна сцена, во период кога се случува процесот на децентрализација, а невладиниот сектор се соочуваат со повлекување на традиционалните странски и домашни фондации како и
2. разработка на можните стратегии за мапирање на потребите на независната културна сцена по пат на ефикасна соработка внатре сцената и во соработка и со централната и локалната власт.

На разговорот ќе се проговори за формите на соработка помеѓу различните актери на културната сцена, за функционално искористување на техничките, инфраструктурните и човечките ресурси, за разбивањето на баукот на НВО културната сцена, за препознавањето потенцијални партнери и за начините на лобирање за културата на национално и локално ниво.

Проф. д-р Милена Драгичевиќ-Шешиќ, предава културна политика, културен менаџмент, културни студии и медиски студии на Факултетот за драмски уметности при Универзитетот за Уметности во Белград. Визитинг професор е на неколку европски универзитети. Консултант и експерт по културна политика и менаџмент е на Европската културна фондација, УНЕСКО, Советот на Европа, фондацијата Марсел Хиктер, Про хелвеција, Британски Совет и др. Има објавено 15 книги и преку стотина текстови. Преведена е на повеќе европски јазици. Нејзината книга Култура: менаџмент, анимација, маркетинг беше објавена на македонски од издавачката куќа Темплум.

Теодор Целакоски е проект директор во Мултимедијалниот институт, МАМА, во Загреб. МАМА е највлијателната невладина организација во Хрватска. Во рамките на овој институт се покренати бројни проекти кои активно ја подобрија културната сцена во Хрватска, а кои имаат не само културни туку и сериозни длабоки општествени аспекти. Активностите на МАМА се тесно поврзани и со промоцијата на новите технологии и новите медиуми. Теодор Целаковски е еден од клучните творци на стратегиите за развој на културната политика во Хрватска, особено во оние сегменти кои се однесуваат на не-институционалната култура и на цивилното општество. Член е на бордот на Националната фондација за развој на цивилното општество.