Точка

промоцијата на деби албумот на Срѓан Јаниќијевиќ
 

Good Old Fashioned е името на авторскиот аудио проект на Срѓан Јаниќијевиќ кој излезе како додаток на новиот број на списанието Маргина. Деби ЦД-то на Срѓан Јаниќијевиќ е вистинска радост за веќе подолго време зачмаената музичка сцена. Станува збор за хибридна творба која би се каратктеризирала како electro-ambient-tech-dub-postpunk-housie-80's pop. Песните поместени на ЦД-то се всушност само дел од обемниот материјал што Јаниќијевиќ го изработи во периодот од 1999 до 2003 година. Гоод Олд Фасхионед е целосно авторски проект на кој се поместени 10 песни (како вокали на едната од нив настапуваат Надежда Петровска и Арна Шијак) и две бонус видеа, во авторство на Јаниќијевиќ за песните Првата година наша и Rally. Роботек го дотера да звучи добро (соунд енгинер и мастеринг). 

Срѓан Јаниќиевиќ, може да се каже, дека е еден од најпровокативните и најкомплексните автори кај нас, кој својот уметнички сензибилитет го испитува во областа театарот, филот, телевизијата, видеото, анимациите, дизајнот, фотографијата, во музиката и во литературата, и тоа секогаш снажно поврзувајќи го својот израз со "отпор" и проблематизирање на малограѓанските и табуизирани општествени модели. Освен како режисер, интересно е да се напомене дека Јаниќијевиќ има и неколку одлични актерски остварувања.

Инаку, Срѓан Јаниќиевиќ има долгогодишно музичко искуство. Како бас гитарист бил дел од групите Борхес и Вел Викторија. Еден од првите позначајни музички самостојни проекти, заедно со Оливер Димитров, е Ниночка. Подолг период настапува и како Дј под името Его ТРИП.

Како позначајни театарски проекти во режија на Јаниќиевиќ ги издвојуваме: Принцезата и зрното грашок, Shoping and Fucking, Цензор, Павиљони, Ослободување на Скопје.