Целта на овој разговор, кој е дел од нашиот проект Слевање на маргините, е јавно да се продискутираат идеолошките премиси на кои е базиран проектот, како и критички да се проанализира целокупниот културен контекст на Македонија во однос на претстојната културна политика на државата - децентрализацијата.

Проектот "Слевање на маргините" е тригодишен проект за поттикнување на културна продукција на локално ниво, културна размена меѓу градовите во Македонија, и културна соработка меѓу различни институции, државни и невладини, како и креативни и уметнички групи и поединци. Проектот е посебно насочен кон младите, запоставените, креативните и иновативните уметници и интелектуалци од различно етничко, културно и социјално потекло. Овој проект е подржан од швајцарската фондација "Про Хелвеција".

Македонија не може да избега од глобалните процеси и од структурните редефинирања на улогите во општеството и прераспределбата на моќта во него. Во класичниот политички образац општеството е осмислувано според модел со кој владеат вертикални форми: пирамида, планина, скала. Денес спротивноста врв-подножје е заменета со спротивноста центар-периферија, а едновремено е променета и општествената динамика. Во денешниот социокултуролошки модел, повикувањето на државата-народ или на територијата веќе не задоволува. Со развојот на индивидуалистичките инстанци во рамките на мултикултурното прашање, расте и значењето на социокултуролошките фактори во обликувањето на општествениот простор, а слабее политичкото влијание врз начинот на којшто се одредува колективниот простор и неговите учесници. Под притисок на социокултуролошките фактори, центарот денес е принуден постојано да ја преиспитува својата концепција на системот, додека групите на периферните позиции се борат да наметнат други концепции.